唔知大家细个阿阵有冇乜童年阴影？
有人嘅童年阴影系呢一幕——
有人嘅童年阴影系呢位——
而我童年一大阴影就系一碗黄黚黚嘅液体（唔好乱谂），叫瘦肉水
！
瘦肉水系广东特产嘅民间偏方，不知从何而起，不知由谁所创，但系起码有一半嘅广东细路仔都曾经畀阿爸阿妈逼过饮过。
瘦肉水
广东家长之传世绝学，取豚肉一块，以犹如沉雷击地的刀法碎其肉身，断其经脉，将肉糜置于水中静待一个小周天，然后以猛火炊之，最后可得黄金圣水，圣水吸收天地之精华，其功效震古烁今，至高无上。
细个嗰阵，由于体弱多病，足足饮咗两年嘅瘦肉水，老窦隔日就煲畀我饮，唔饮完就唔畀瞓觉。
虽然瘦肉水唔难饮，但系日日饮真系会崩溃噶！之后有段时间，我见到瘦肉就反胃！
——小沅子与瘦肉水不得不说嘅过去
后来一问其他同事，先发现大家细个嗰阵都畀老窦老母逼过饮“民间偏方”，下边呢啲偏方唔知你以前又有冇试过呢？
可乐煲姜
以可乐一罐，配以适量姜片煮制，以求两者阴阳调和、乾坤归一，此法虽简单但起效极巨，对感冒咳嗽等症均一击即中，正所谓“大道至简”也，故常年夺得民间偏方首位嘅名头。
每当感冒咳嗽，阿妈就会煲碗可乐煲姜，饮咗感冒就会好快好，虽然对止咳系有啲作用，但我觉得我感冒好同佢冇乜关系咯……
直至今日，我都未谂明白，可乐煲姜同我直接饮可乐再食姜有咩区别？
——六叔童年嘅可乐煲姜
蝉蜕煲冬瓜
广东家庭主妇嘅独门消炎降烧秘方，蝉蜕与冬瓜合炖半炷香，此方一出，即疏四肢之热毒，消百骸之肿痛，功力所至使对手如坠冰窟，与九阴神功相比，有过之而无不及。
首先声明，我极其惊虫，饮蝉蜕煲冬瓜，我从灵魂深处拒绝！
但系我阿妈根本唔同我讲入边有蝉蜕，就话系冬瓜汤，就系咁畀我阿妈水咗……
——畀水妈水嘅阿水の蝉蜕冬瓜汤
双飞人加水
不知何人闭门钻研所得，江湖上威名赫赫的双飞人与水混服，威力无穷，竟有抑制头痛牙痛之奇效，有服用者自称，服用此方如被打通任督二脉一般通体顺畅，百毒皆解，可谓江湖一大奇观。
饮过一次双飞人加水，从此就开启咗新嘅大门！我原先一直以为双飞人就系用嚟涂！
真系怀疑过呢个偏方系咪双飞人嘅营销手段，唔系边个谂到将一个外用药加水饮！
——双飞人为阿Q打开嘅新大门
姜葱豆豉水
一种奇异无比的偏方，将常见的豆豉、姜葱结合变成罕见至极、独一无二的汤药，用以克制寒感冒初期的头痛、喷嚏、发冷，解表和中，所向无敌，据说感染风寒之后立即服用，效果最为显著。不过其味道真真是不可描述……
当年我阿妈叫我饮阿阵，我曾经怀疑过自己系咪亲生，到依家都唔想回忆嗰种神奇嘅味道。不过效果又真系好到你唔信，药到病除！
——阿咩最难忘嘅一碗姜葱豆豉水
**以上仅代表个人经历，大家尝试偏方之前都系要三思而行，根据实际情况决定！
各位自己友，
你哋细个又试过咩民间偏方？
佢哋真系有效，定阿爸阿妈老点咗你？
留言分享下你嘅经历！
图片素材来源于网络
本文看点由羊城网原创
